تصرفات كتيرة بيعملها الآباء والأمهات في حق أطفالهم بتأذيهم، متخيلين إنهم بيربوهم، يمكن أتكلم عنها في مقالات تانية. هنا هتكلم عن الجمل المؤذية اللي بتتقال للطفل الأكبر.

1- إنت الكبير متبكيش

مش فاهمة فعلاً لما الطفل يكون حزين أو غضبان، المفترض يعبّر عن حزنه وغضبه ازاي لو معبرش بالبكا، يقوم ينتحر ويوفر وقت مثلاً! هو لسه هيبكي! متفهمة إنك مش عايزه يبكي عشان بكاه مصدعك، أو إنك فعلاً بتحبه ومش عايزه يبكي، بس هل السبب اللي هيخليه يبطل بكا إنه الكبير فعلاً! لو إنت محتاج تعلّم طفلك ميتعاملش مع مشاكله دايماً بالبكا، ده شيء كويس، بس لازم الأول تفهم مشاكله الحقيقة إيه وتتعامل معاها وبعدين تطلب منه ميبكيش غير على الحاجة اللي تستاهل البكا.

2- إنت الكبير سيب لأخوك الصغير  اللعبة

الطفل الكبير ده عادة هيكون فرق السن بينه وبين أخوه مش كبير لدرجة إنه يخليه مش في سن الطفولة، هو كمان طفل ومن حقه يلعب زيه زي أخوه، فحضرتك لما بتعمل كده بتعمل في طفلك مصيبتين أكبر من بعض: الأولى: إنه بيحس بالظلم وممكن يعبر عن إحساسه ده بالعنف ناحية أخوه اللي هيترجم إنه سبب الظلم اللي بيتعرض له في العالم. الثانية: إنه ممكن يتحول لبني آدم ضعيف، بيتخلى عن حاجته بسهولة تحت أي ضغط بدل ما يدافع عن نفسه.

3- دافع عن أخوك، لازم تحميه

متفقة بشكل كبير مع سلوك الأهل لما بيحبوا يغرسوا في الطفل الكبير الإحساس بالمسؤولية ناحية إخواته الأصغر، لكن مش متفقة أبداً إن ده يكون بشكل مبالغ فيه، لدرجة إنهم يتخلصوا من مسؤوليتهم ويرموها على كتف  الطفل الكبير، فجأه الطفل هيحس  إنه شايل حمل هو مش قده، وأحياناً شايل ذنب إنه معرفش يدافع عن أخوه أو يحميه في موقف معين هو فعلاً أكبر من قدراته كطفل.

4- اللعبة دي تنفع لأخوك الصغير، أنت كبرت على الألعاب دي

ألعاب الأطفال غالباً بيكون مكتوب عليها السن اللي تصلح له اللعبة دي، الطفل اللي عمره سنتين مش هيلعب باللعبة نفسها اللي تنفع لطفل عنده 5 سنين. كتير من الأهل لما بيكونوا في محل ألعاب الأطفال، بيعنفوا الطفل الكبير لو اختار لعبة زي اللي اختارها  الطفل الصغير، من غير ما يفهموه هم بيعملوا معاه كده ليه، كل اللي بيفهمه إنهم بيحققوا لأخوه اللي عايزه وهو بيحرموه، بدل ما الطفل يوصل لنتيجة إنه ضحية ومظلوم بالمقارنة بأخوه.  

5- متقلدش أخوك الصغير، بطّل تفاهة

وصف طفل بالتفاهة هو من أغرب الأوصاف اللي سمعتها في حياتي الحقيقة، المفروض الطفل يهتم بمشاكل الشرق الأوسط ويقعد يتكلم معاكم في السياسة عشان ميبقاش تافه! أعتقد أفضل من اتهامه بالتفاهة اللي هو مش فاهم معناها أساساً، بس مستوعب إنك بتنتقده، إنك تفهم هو ليه بيقلد أخوه في طريقة الكلام أو طريقة المشي! التقليد غالباً بيكون نتيجة لكذا حاجة مثلاً: