كشفت الفنانة هالة صدقي كيفية حصولها على الطلاق من والد طفليها سامح سامي، رغم عدم وجود طلاق في الشريعة المسيحية، مؤكدة أن سامح قام بتغيير ملته، وفي هذه الحالة يتم اللجوء للشريعة الإسلامية، وقالت إن طلاقها حتى الآن مدني صادر عن محكمة الأحوال الشخصية، ولكنها لم تحصل على الطلاق الكنسي حتى الآن، ويتوجب على سامي التقدم إلى الكنيسة للحصول على تصريح الطلاق.

أضافت خلال مداخلة هاتفية في برنامج “الحكاية” المذاع على شاشة mbc مصر ويقدمه الإعلامي عمرو أديب: "أنا حاولت الحصول على الطلاق بكل الوسائل إللي هو تغيير ملة بس معرفتش الحقيقة فشلت وهو راح غير ملة وساعدني جداً أن الموضوع يخلص، والطلاق حصل لما هو غير ملته، أنا بس اتطلقت مدني لأني تبع قانون مصر، بتغيير الملة أنا بقيت تبع الشريعة الإسلامية، فأنا متطلقة طبقاً للشريعة الإسلامية هو لما يغير ملة إحنا أوتوماتيك بنبقى تبع الشريعة الإسلامية فنتطلق عادي، إحنا اتطلقنا مدني لكن الكنسي لسه، الكنسي إنك تروح الكنيسة والمجني عليه هو إللي بياخد تصريح".

وعلقت هالة صدقي على انتشار مقطع فيديو لها وهي تحتفل بعد إعلان نبأ طلاقها، وقالت إنها لم تكن تحتفل وإنما الفيديو كان أثناء كواليس تصوير مسلسل “العمدة” المقرر عرضه ضمن المسلسلات المصرية لرمضان 2023.

تابعت قائلة: "المساعدة بتاعتي كانت بتعلمني الزغاريد، إني أزغرد بشكل شعبي، هي إللي كانت بتزغرد مش أنا على فكرة، لكن أنا في التصوير دايماً لازم يبقى فيه مزيكا وجو ودايماً بحط مزيكا على حسب الحالة إللي أنا بشتغل فيها.

وعن مشاعرها بعد الطلاق، أجابت: أنا معنديش أي مشاعر ولا إحساس، يعني أنا بعتبر أن دي إجراءات ورق، يعني أنا مش فرحانة وبتاع لاء هي إجراءات الورق، الطلاق الفعلي حصل من 8 سنين لما عرفت أن إحنا استحالت العشرة مع بعض، فالطلاق نفسياً آه تعبت وقعدت حوالي سنتين أو 3 سنين مش مستوعبة إللي بيحصلي ده، كانت صدمات ورا بعض، لكن أنا خدت الصدمة من 8 سنين مش من دلوقتي، أنا دلوقتي ده إجراءات ورق حصلت حصلت محصلتش مش فارقة معايا.

وتابعت قائلة: "لكن طبعاً هبقى كذابة لو قولتلك إني مفرحتش، لاء أنا فرحت لأنه على الأقل أنا اسمي مش على اسم الإنسان ده، لأن أنا لحد آخر لحظة محترمة اسمه في حياتي، يعني عاملة اعتبار إني على اسم راجل، فأنا دلوقتي حتى لو أنا مش هعمل أي حاجة مختلفة عن طبيعة حياتي بس فيه حتة إني مش على اسم الراجل ده".