أغلقت النجمة التونسية درة باب الخلافات مع زميلتها الفنانة حورية فرغلي، وألمحت لحدوث وقيعة بينهن على خلفية ترتيب الأسماء في عملهما المشترك فيلم "مصور قتيل" الذي عرض عام 2012، وأكدت درة أنها تتمنى لحورية كل الخير، وواثقة من طيبة قلبها.

أضافت درة في مداخلة هاتفية لبرنامج "قعدة ستات" بحضور حورية فرغلي: ساعات بيبقى فيه سوء تفاهم بين اثنين، وساعات فيه ناس ممكن توقع في النص، أو ممكن تعمل حاجة مش صح، فأنا متأكدة أن زي ما أنا قلبي طيب هي كمان قلبها طيب ومفيش بيننا حاجة خالص.

وتابعت: بالعكس، فيه كل احترام وكل حب.. أنا من زمان بتعجبني كممثلة، يمكن متعاملناش مع بعض كتير لكن أتمنى لها كل السعادة والخير من قلبي، وأكيد إن شاء الله نتقابل ونعمل حاجة حلوة مع بعض.

واعترفت حورية بوجود سوء تفاهم، ووجهت التحية لزميلتها درة، مؤكدة أنها كانت دائمة السؤال عن حالتها الصحية أثناء الأزمة الأخيرة.

وسبق أن كشفت درة حقيقة تصريح حورية فرغلي، بتعمدها عدم وضع اسمها على أفيش فيلم “مصور قتيل” وذلك خلال لقائها ببرنامج حبر سري الموسم الثالث.

وقالت درة: لا طبعًا، ربنا يوفقها وربنا يشفيها، والفيلم من زمان ودي مش حقيقة ولا تمت للحقيقة بصلة، وأنا معنديش السلطة دي، وحتى لما بعمل حاجات ببطولات مطلقة عمري ما عملت كده، وعندي أعمال كتير ونسائية زي سجن النسا، ومعنديش خلافات مع حد.