هاجمت الفنانة شذى مغني المهرجانات حسن شاكوش بعد ظهوره في برنامج "العرافة" مع الإعلامية بسمة وهبة، بعد سخريته منها وأنه لا يعرفها ولا يعرف أنها مغنية ولا يتذكر اسم أي أغنية من أغانيها.
وكتبت شذى عبر حسابها على Facebook موجهة كلامها لحسن شاكوش وقالت: طب أنت مستفز يا شكشك بدل كلمة مستفز بتعصبك ودكتورة بسمة وهبة علشان هي ست شيك، قالتلك شذى فنانة زميلة علشان تجبر بخاطرك بس الحقيقة أنت لا فنان ولا زميل بالنسبالي خالص، أنت مؤدي وبالنسبالي صوتك مزعج أنما فنان زميل دي أنا اعترض عليها بشدة ودي الحقيقة.
وتابعت: أصلا مينفعش تسأل مين دي مش علشان لازم تكون عارفني بيني وبينك اريح لو متعرفنيش وتعمل الشويتين بتوع اه عارف اسمها ومش عارف أغانيها ومال شكلها اتغير كده ليه وجو 3 ورقات ده، لأن الرد موجود ما أنا لو محدش فاكرني ولا عرفني مش هيجيبوا كلامي ويعرضهولك يا جال، وأصلا أسماء الأغاني اللي أنت قولتها دي تتكتب على تكاتك متعملش فيها بيتهوفن والنبي ومش معنى أن في هيصه الفترة دي على اللون ده أن أنت واللي زيك صناع المزيكا في مصر أبدا والله انتوا فاضحنا في العالم كله بردائه المزيكا اللي بتقدموها.
وختتمت شذى كلامها: عموما وعمليا ردك ملهوش دعوه خالص بالسؤال ولا فهمت منك حاجة ومش عيب أنك تحضر قبل الحلقة عفوي وعلى طبيعتك دي لما تكون قاعد على مصطبة أو واثق في ردودك الذكية المنطقية اللي هي مش موجودة أصلا ف ابقى حضر بعد إذنك علشان بدوخ المذيعين معاك، ملحوظة الجاكت اللي كنت لابسه حريمي يا فنان.
وكانت بسمة وهبة سألت حسن شاكوش عن شذى والانتقادات التي وجهتها له لأنه لا يجيد الحديث وقال عنها: هي بتغني؟.. هي دي مغنية؟.. بتغني إيه؟؟؟ معرفهاش والله العظيم، أنت حافظة لها أغاني، ربنا يتولاها، أنا مش مستفز زي ما هي بتقول، أنا بتكلم بطبيعتي ومبحضرش، لكن أنا مبغلطش، ومش بحب أكون FAKE.
