كشفت الفنانة يسرا اللوزي تفاصيل اعتزالها ممارسة كرة القدم.

وقالت اللوزي خلال لقائها ببرنامج "واحد من الناس" عبر قناة "الحياة": "كنت بلعب كرة قدم نسائية بس مدخلتش المنتخب، أنا كنت بلعب مع الولاد في النادي علشان مكنش فيه دورات رمضانية نسائية في الوقت ده، بس جاتلي مشكلة في ركبتي فاضطريت أبطل لعب".

وأضافت: "كنت بلعب مدافع كويس أوي وكنت أخاف أهاجم وبعدين لعبت صانعة ألعاب وكنت أهلاوية متعصبة بس زمان، أنا بطلت أشجع لأن لما جالي الإصابة في الركبة اكتأبت لإني كنت بحب الكرة أوي وبعدين لقيت الدكتور بيقولي متجريش ومتدبيش رجليك في الأرض ومفيش كورة تاني ودي كانت بالنسبة لي حالة غريبة وبقيت مش قادرة اتفرج علي أي ماتش".

وتابعت: "لما بتفرج على ماتشات بفضل اعيط فقفلت صفحة الكورة علشان اعيش، ومبقتش اتفرج علي أي ماتش ومبقتش اتفرج علي أي ماتش للأهلي دلوقتي ممكن افتكر تشكيل الأهلي زمان والذكريات ولكن تشكيل الأهلي دلوقتي معرفهوش".

وشاركت يسرا اللوزي في مسلسل "جميلة" في موسم رمضان 2023 وتدور قصته في إطار تشويقي واجتماعي، ويسلط الضوء على مشاكل الميراث و مواجهة الأزمات الزوجية، حيث تظهر بطلة العمل بدور "جميلة" متزوجة من هاني عادل، وتشهد حياتهما تطورات عديدة وتسيطر عليها المشكلات والأزمات ويسعيان لحلها، إضافة إلى مواقف ومفاجآت عديدة تكشفها أحداث المسلسل.