الحقيقة إن الفروق بين البنت والولد شاسعة جداً جداً، يعني فرق مجرات وسنين ضوئية

البنت بطبعها بتعبر عن الرقي من الصغر، لكن الولد بيعبر عن العته المبكر، يعني وجه التشابه بينهم هو الشبه نفسه اللي بين إنسان الغاب وإنسان القرن 21 اللي بيرتشف الشاي على أغنية شيك شك شوك.   خلينا على قناعة إن البنت بتحب تبان مميزة، فلو صاحبتها سألتها جبتي الحلق ده منين! هتقولها عارفة آخر الشارع، في بنزينة ملكيش دعوة بيها، كملي هتلاقي مستشفى طوفي حوليها 9 مرات، امشي آخر الشارع كمان مرة، بس كده من بلوتو على إيدك الشمال.   الولد بقى لو صاحبه سأله يقنع باقي صحابهم وياخدهم كلهم يشتروا معاهم عشان يخدوا تخفيض. البنت وهي نازلة بيبقى معاها شنطة فيها محفظتها اللي فيها صورها وفيها صور صحابها وجدتها وعمتها وبنت بنت خالة جارتها وكارنيه النادي والبطاقة وكروت شحن قديمة وايبس وكلينكس وفونديشن غامق وفونديشن فاتح، وأزازة أنتوسيد، وبنادول إكسترا، وسندوتشات عشان لو جاعت، وبرفيوم و 17 18 قلم روج، وجليسرين وديتول، وبتشيل الموبايل والفلوس في جيبها، وفي الآخر تقولك أنا حاسة إني ناسية حاجة.   الولد بينزل برنس واحتمال ينسى الموبايل والفلوس والجزمة والشراب عادي. لو عملت سيرش ازاي تخلي ولد يتجنن بيكي، هيقولك في 6 خطوات اجعليه يكتب عليكي. لكن الولد لو عمل سيرش هيقوله 99 خطوة عشان تبصلك، 218 عشان تعجب بخلقتك، 1444 عشان تفكر تتجوزك.   البنت في الامتحانات تلاقيها منهارة وبيشربوها مياه بسكر عشان نسيت الضمة على حرف الواو في السطر الأخير في السؤال الاختياري في الفيزياء.   الولد بقى تلاقيه طالع من اللجنة بيرقص وتقوله إيه يا سطا، عملت إيه في السؤال ده، يقولك ده اختياري محلتوش، طيب عملت إيه في ده! يقولك لا، ما ده كان إجباري وأنا محدش يغصبني على حاجة فمحلتوش برده. البنت لو وقعت صحبتها تلاقيها قلبت على صوت ميني ماوس وهي بتجري تلقف صحبتها:     لكن الولد لو صاحبه وقع تلاقيه وقع جمبه من الضحك، وأهو من باب المشاركة الوجدانية وصاحبه يقوم والناس تحاول تقنعه يبطل ضحك مفيش.   البنت لما بتجيب هدية بتدخل وتقول للسيلر: أنا عايزة حاجة سبيشيل وأغلى حاجة وعيزاها ملفوفة بورق بينك وبوستاج ورشلي حبة جليتر.   الولد بقى يروح عند محل 2 جنيه ونص، ويقول للبياع ازميلي عايز أي حاجة عليها خصم 99.9 %، ولفهالي في أي ورقة جرايد، أنت عارف الحاجات دي بتتنظر من باب إن الصرف باين. البنت قبل الفرح بتلف 8 شهور على الفستان وتحجز قبلها بـ 8 سنين عن ميك آب آرتيست بـ 78 ألف جنيه، الولد بقى قبل فرحه ينزل بأسبوع، يفصل بدلة ويوم الفرح يروح عند صبحي الحلاق بـ 20 جنيه.