كشفت الفنانة عائشة بن أحمد، عن رأيها الشخصي في فكرة الزواج، مؤكدة أنها تشعر بالخوف من خوض التجربة، وأكدت بنفس الوقت أن مسلسلها الأخير "مذكرات زواج" الذي عرض في النصف الأول من موسم المسلسلات المصرية لرمضان 2023، التزم موقفاً محايداً في عرض هموم الرجل والمرأة.
عائشة تحدثت لأول مرة عن رأيها في فكرة الزواج، وقالت خلال لقائها في برنامج “ItsShowtime” المذاع عبر شاشة “CBC”: “أكيد طبعاً الجواز مش حاجة سهلة خالص، هو محتاج مجهود وذكاء ومذاكرة ووعي، وكل حاجة وإلا الموضوع مش هيكمل، أو هيكمل بس مش هيبقى أحسن حاجة”.
أضافت عائشة بن أحمد: "أنا بخاف، مش عارفة لما أتجوز ويبقى أنا وحد تاني مقفول علينا بيت هبقى عاملة إزاي، هكمل إزاي، فببقى خايفة، ببقى شايفة ده من بعيد من خلال صحابي، وفي حاجات بتطمن وفي حاجات مبتطمنش خالص، أنا بحس أنه محتاج مجهود من الطرفين".
وكشفت عائشة بن أحمد تفاصيل مسلسل مذكرات زوج، قائلة: مسلسل مذكرات زوج محايد، ليس مع الرجل ولا الست، الرسالة أو الفكرة التي حاول المسلسل طرحها إن لازم يبقى فيه تواصل بين الزوج والزوجة طوال الوقت.
وتابعت: ولازم يبقى فيه ذكاء ووعي عشان العلاقة تكمل، فالكلمة الحلوة بتفرق وممكن تخلي العلاقة في سكة حلوة أوي، وأن العلاقة تكمل بعد 20، 30 سنة، هي محتاجة مجهود ومذاكرة.
وواصلت قائلة: وإحنا متعودين نشوف الست ضعيفة ومنكسرة لكن إحنا شوفناها في المسلسل زعلت في الأول وبعد كده فاقت لنفسها وعاشت حياتها وطورت من نفسها، وشوفنا الست القوية إزاي كملت وبقت أحلى.
شارك في بطولة "مذكرات زوج"، طارق لطفي، عائشة بن أحمد، خالد الصاوي، سما إبراهيم، إدوارد، عمر الشناوي وسارة الشامي، علي الطيب، جيهان الشماشرجي، حازم إيهاب، فدوى عابد، هناء الشوربجي، الطفل آدم وهدان، الطفلة حبيبة، والطفلة ريتال ظاظا.
