خلال لقائها مع الإعلامية سهير جودة عبر البرنامج الذي تقدمه على صفحتها الرسمية بـ"فيسبوك" كشفت شاليمار شربتلي زوجة المخرج خالد يوسف، العديد من أسرار حياتها الشخصية والعملية، وأسرار علاقتها بزوجها، كما تحدثت عن الغيرة في حياتها مؤكدة أنها عندما تزوجت خالد يوسف كانت تعرف أنه مخرج وليس شيخ مسجد.

وقالت شاليمار إنها الوحيدة التي تقوم بالرسم على السيارات، فهي رسامة تجريدية، ورسمت من قبل على سيارة ودخلت سباق الفورمولا وفازت، مشيرة إلى أنها لم تشعر بالخوف على الإطلاق: "لو خفت من الريشة مش هتقدر املكها، وده معترج حب يا إما اللون يتحول إلى عدو ويهجرك أو يكون حبيب لما تقربي منه".

وكشفت عن سبب تسمية ابنتها على اسمها، قائلة: "والله مش أنا اللي اخترت الاسم لبنتي، لكن اللي اختاره خالد يوسف، عمل إنه رومانسي، واتفاجئت بيه بيكتب اسمها شاليمار، وهو فعلا كان وقتها رومانسي، أيام الرومانسية".

وأكدت أنها لا تغار على زوجها بالرغم من تواجد بعض البنات حوله من أجل الحصول على فرصة من أجل التمثيل، قائلة: "لا خالص أنا مش بأغير، أغير عليه ليه ده هو اللي بيغير، وكون إن في بنات بتقرب منه لأن ده مجاله، انا متجوزتش شيخ مسجد أنا اتجوزت مخرج، وهو اتجوز رسامة، هو حواليه ناس كتير والرسامة حواليها ناس كتير، وعن قناعة ارتبطنا ببعض، وأنا أصلا شخص مش غيور ودي من مواصفات برج الدلو".

وأكدت أنها لا تعطي أي اهتمام للشائعات التي تخرج على زوجها، مشيرة إلى أنه شيء معادي لحياتها تقوم بتجنبه فوراً، قائلة: "أومال بقى اللي متجوزة دكتور نساء تعمل إيه، إنتي اختارتي الحياة دي فلازم تعيشيها، أنا مش بأغير خالص".

وأشارت شاليمار إلى أنه لا يوجد شيء يسمى تنمر، موضحة إننا بشر ومجبرون على السخرية، وهذا جزء من تركيبتنا خصوصًا من لهم عروق مصرية: "لو خايفة من كلمة التنمر لازم ابنك تربيه يبقى نبت قوي، لما حد يتنمر عليه يعرف يرد".

وتابعت: "وأنا صغيرة كنت بضرب العيال، طويلة بقى وعندي ثقة في نفسي ما أنا متربية مع 4 ولاد للأسف كنت عنيفة، وأي حد يعادي صحابي كأنه عدو لي، أنا راجل الشلة وفتوة الشلة ومسئول الشلة وهذا أمر يسعدني".

وأكدت شاليمار أن مسئولية الأمومة هي أضخم مسئولية في العالم: "عارفة يعني إيه يبقى معاكي بيبي صغنن مش عارفة هيصحى إمتى وهيجوع إمتى، وعمر ما في عيل بيموت نتيجة إنه جعان من أمه، مسئولية ربنا أعطاها للست من سابع سماء، الأم عمرها ما تكون رقيقة إطلاقًا، الأم دي اللي لازم تكون قوية وحادة مع أولادها لكي يصبحوا رجالاً، وأنا مش مع التربية الحديثة اللي بتعملها أمهات اليومين دول، لازم الأم تبقى قوية مش ضعيفة، والأم اللي تتعامل مع ابنها بالشوكة والسكينة متبقاش أم، كلمة الضنا غالية جدًا، ربنا سمى اسمه الرحمن من الرحم".

وكشفت أن الفنانة هالة صدقي دورها في مسلسل "جعفر العمدة" بشخصية "صفصف" كانت شخصية شعبية، لذلك كانت قريبة من الناس، لكن دورها في مسلسل "سره الباتع" ملحمة، فالأمر كان مختلفاً: "أنا لما أسمع عبدالحليم غير لما أسمع سكر محلي محوط على كريمة.. صفصف شخصية شعبية قربت من الناس وحبوها بجد، وأنا وهالة صدقي شخصيتان مختلفتان وبيجمعنا الحب وإحنا شبه بعض، فقلت أنا لو مثلت المخرج هيحتار بيني وبينها بسبب الشبه، وهالة ممكن تكون أرق مني شوية".

وأشارت إلى أن الفن يسير في دم عزيزة جلال وطوال الوقت تغني عندما تريد، لكنها ليست شخصية مستهلكة وهي شخصية منضبطة وكلمتها سيف، وهي ليست شخصية منفلته في الماضي، فتركيبتها مختلفة: "هترجع وهتغني وهتملى الدنيا غنا، وهاستقبلها في المطار".

وعن علاقتها بزوجها المخرج خالد يوسف قالت: "معنديش عتاب عليه خالص خالد وقف جنبي في مواقف كتير وربنا يخليه ليا ولبنتي، أعاتبه على إيه ، وأنا مش رومانسية، وانا برج الدلو ورومانسية البرج في أفعاله مش في الكلام وخالد ميزان، وأنا وهو مختلفين كل واحد له آراء مختلفة بس بيجمعنا الحب، وكل واحد فينا بيحترم اختلاف التاني حتى لو اتخانقنا ومتكلمناش، وإحنا أصلا آرائنا السياسية مختلفة".