قرر الممثل الشاب هادي خفاجة اعتزال التمثيل نهائيا في مصر والتوجه إلى أي دولة أخرى والتمثيل بها، وذلك بسبب موقف تعرض له مع القائمين على برنامج “وش السعد” الذي يقدمه محمد سعد عبر قناة ” لم بي سي مصر”.
وكشف الممثل الشاب عبر حسابه الشخصي “فيس بوك” قائلا: “قررت أنا هادي خفاجة اعتزال التمثيل نهائيًا في مصر، وده بسبب الموقف اللي أنا هاحكيه، هو موقف في قمة قلة الذوق اللي في الدنيا، جاتلي مكالمة الساعة ١٢ بالليل إن محمد سعد عايزني في تصوير في حلقة من برنامج وش السعد اللي هي كانت النهاردة، وإنه عايز يقعد معايا طبعًا لبست ورحتله الساعه ١ بليل كان موجود الكاست كله ونجوم الحلقة آيتن عامر ومنة عرفة، وعملنا بروفة واتفقت مع مدير الإنتاج والملابس وكل حاجة، وأستاذ سامح عبد العزيز المخرج قعدت معاه واتكلمنا عن الشخصية واتفقنا أن التصوير بعدها بيوم”.
واستكمل خفاجة: “خلصت كانت الساعة ٤ الفجر روحت البيت نمت وصحيت استعديت نفسيًا إني رايح التصوير وحفظت السيناريو، كان المعاد الساعة ٥ المغرب، لقيت اتصال وأنا في الطريق الساعة ٤ العصر من واحد من مساعدي الإخراج بيقول لي أستاذ هادي إحنا أجلنا الإسكتش بتاع حلقة حضرتك وهنكلمك نقولك إمتى التصوير إن شاء الله.. أفتح Mbc Masr من شوية ألاقي الإسكتش بتاعي اتصور بممثل تاني”.
وتابع :” طب ليه اللف والدوران، الحمد لله تاريخي مش هيقف على حلقة، بس موضوع تقدير، أنا حبيت أحكي لأني وسط حاجات كتير حصلت لي مكنتش مستحمل حركة زي دي، وبكرة بإذن الله هاكون في نقابة المهن التمثيلية وهاسلم أستاذ أشرف ذكي عضوية النقابة لأنها متلزمنيش في شيء دلوقتي، بس بجد كفاية تدمير في المواهب وإحباط في الناس لأن الوسط بجد أصبح عصابات بتتحكم فيه.. وإن شاء الله هاكمل مستقبلي الفني في دولة تانية بتقدر الإنسانية قبل المواهب والمجالات، وده قرار نهائي بجد بيني وبين نفسي مش هرجع فيه”.
يذكر أن هادي خفاجة بدأ التمثيل وهو في الثالثة من عمره حيث شارك في عدد من الأعمال الفنية كطفل منهم ” عائلة الحاج متولي ” و”عباس الأبيض” و ” أبو علي، و”شعبان الفارس”، “الناس في كفر عسكر”، “أبو ضحكة جنان”.