دعمت الفنانة راندا البحيري، المطرب رامي جمال، بعد إعلانه لأول مرة أمس، عن إصابته بمرض البهاق، ومعاناته بسببه، وتفكيره في الاعتزال.
نشرت راندا صورة لرامي عبر حسابها على Instagram، وعلقت كاتبة: "الحمد لله علي كل شئ.. أنا بحبك أوي يا رامي وأنت أكيد عارف ده. ربنا يقدرك علي اللي هتشوفه أكيد من المجتمع. بس أنا عن نفسي بنصحك... تولع الناس. وخليك مع القريبين. وانجح. واشتغل أكتر من الأول كمان. بحبك جدا".
وكان رامي جمال كتب عبر حسابه الخاص على Facebook، إيضاحًا حول حالته الصحية، قائلًا: "الحمد لله الذي أحبني فابتلاني، وأقدرني على الصبر من فترة ظهرت بقع بيضا في جسمي وبالكشف عرفت إنه البهاق، وجربت انواع علاج كتير ودكاترة كتير ومفيش فايدة، رضيت وسلمت أمري لله علشان عرفت إن الزعل بيزوده وكفاية شغلانتي وصعوبتها والقلق الدائم من المستقبل".
تابع: "وفعلا بقى بيزيد لدرجة لفتت نظر ناس كتير اللي بقى يقولي هتتعامل إزاي وأنت فنان واللي يخاف يسلم واللي يسألني هو ده معدي، أنا بقالي سنة فعلا لو عندي حفلة أو تصوير بتعب على ما أشوف طريقة أخفيه بيها لدرجة خلت ناس تقول لي شوف بيزنس تاني أعمله علشان الناس مش هتقبلك كده".
أضاف رامي جمال: "فكرت في كلامهم بصراحة ولقيت إن عندي حلين يا فعلا شكرا لحد كده على الشغلانة دي رغم حبي ليها وعدم معرفتي بغيرها، يا إما مش هداريه تاني وتقبلوني بيه وترحموا كل اللي بنا ابتلاهم بيه من نظرة إن شكله غريب الحمد لله على نعمة الأهل لأنهم الوحيدين اللي بيقبلوا الواحد زي ما هو، طولت عليكم بس قولت أشرككم في حياة فنان".
