أعلنت ملكة جمال الكون السابقة، دارين حلمي، خطيبة الفنان تامر عاشور تفاصيل فسخ خطوبتها .
ونشرت دارين بيانًا،عبر صفحتها الرسمية على انستجرام، استشهدت خلاله بقوله تعالي: “يا أيها الذين آمنوا إن جاءكم فاسقٍ بنبأٍ فتبينوا أن تصيبوا قومًا بجهالة فتصبحوا على ما فعلتم نادمين”.
وقالت :نظرًا لاتهامات وإشاعات اتوجهت لي الفترة اللي فاتت وبدون وجه حق، كان لازم أخرج عن صمتي وأوضح موقفي لإن مش دارين اللي تاخد راجل متجوز أو تكون سبب في خراب بيت حد، وبالتالي مليش ذنب في أي حاجة، تامر دخل البيت من بابه واتقدم لأهلي رسمي على أساس أنه مُطلق وده اللي أنا كنت فاهماه زيي زي جمهوره.
وأضافت:عادي إن بنت ترتبط براجل مُطلق مش أزمة، وحصلت الخطوبة بشكل رسمي زي ما عرفتوا ومشيت الأمور في مجراها الطبيعي لحد ما بالصدفة اكتشفت أن لسه زوجته على ذمته وفيه قضايا بينهما، ولم يتم الانفصال بشكل رسمي، أي بنت في الموقف ده طبعًا لازم تنسحب مهما كان الحب، ومهما كانت العواطف لأن مش دارين حلمي اللي تاخد راجل من زوجته مهما كان هو مين.
وأشارت.. كده كده أنا كنت مستمرة في مسابقات ملكات الجمال وليا الكارير الخاص بيا، فكل مرة بقرر الانسحاب كان تامر بيرفض، وإن كده كده الطلاق قائم سواء أنا في حياته أو لأ وده مش يخصني في شيء، لكن في الآخر أنا صممت على فسخ الخطوبة بمنتهى الاحترام ما بيني وبينه لأنه مينفعش وكل التوفيق والنصيب بإيد الله، ربنا يوفقه في حياته ويوفقني في خطواتي الجاية إن شاء الله.
وقالت دارين عن تامر : تامر إنسان محترم مشفتش منه غير كل خير واحترام وحب، وأنا بحترمه على المستوى الفني والشخصي لكن ده نصيب وربنا يوفقه في حياته، وأتمنى محدش يتكلم في حاجة ميعرفش تفاصيلها، وشكرًا لكل الناس اللي بتحبني وعرفاني كويس، أظن أنا جاوبت على كل حاجة ومش هفتح الموضوع ده تاني نهائي أرجو احترام موقفي.
الجدير بالذكر أن عاشور ودارين ارتبطا فى بداية العام الماضى بعد قصة حب كبيرة، لكن حدثت الخلافات بينهما وانتهت العلاقة.
