شرح الفنان أحمد زاهر ملابسات الموقف الذي تعرض له في جنازة الفنانة دلال عبد العزيز.
وخلال مداخلة هاتفية مع الإعلامي يوسف الحسيني في برنامج "التاسعة" على القناة الأولى المصرية، قال أحمد زاهر: "اللي حصل كان شيء عجيب، بنتي ليلى كانت منهارة بشكل غير طبيعي لإن علاقتها بالفنانة الكبيرة رحمها الله أستاذة دلال عبد العزيز كانت بتعتبرها زي أمها. حاول أكثر من مرة يصور بالموبايل، فأنا باقول له من بعيد لأ بلاش. مش فاهم إيه السبق في إني أجيب حد منهار من العياط."
وأضاف: "خرجنا بره مكان الدفنة خالص، عشان نروح لغاية العربية ونركب، لقيته داخل بالموبايل في بقنا، مش مثلا بيصور من بعيد، وبعدين أصلا أعرف منين إنه صحفي. كل اللي عملته قلت له بتعمل إيه، خدت الموبايل من إيده اليمين حطيته له في إيده الشمال، وقلت له عيب كده، أنا قلت لك أكتر من مرة بلاش تصور، وسيبته ومشيت، مجرد ما إتحركت قعد يشتم ويقل أدبه."
وتابع: "معرفش ليه ادعى هذا الادعاء، ويشاء ربنا سبحانه وتعالى صدفة يبقى في أكثر من صحفي معروف موجود وشاف الواقعة بعينه، أنا مردتش لإن دي لا أخلاقي ولا تربيتي."
