بعد تذكيره في أكثر من تعليق بتبرير قرار انفصاله عن النجمة الشابة منة عرفة بأنه "رجل شرقي وصعيدي"، قام الفنان والمنتج محمود المهدي بتوضيح قصده من هذه العبارة، نافيا أن تكون زوجته قد تورطت فيما يسيء إليه أخلاقيا، كما نفى تمام أن تكون زوجته المقصودة بمنشور البطيخة الشهير.

المهدي قام بتوضيح قصده عبر خاصية الاستوري بحسابه على موقع انستغرام قائلا: كان في سوء تفاهم في مشهد من مسلسل 101 مع الفنان محمد نجاتي وحد معين حب يوقع بينا ووصل الموضوع ليا غلط.

وأضاف المهدي: أنا كراجل رافض أي مشاهد تمس كرامتي كراجل زي ممثلات كتير بتعمل أدوار محترمة مش كله زي بعضه ومنة متفهمة الكلام ده ومحافظة على كرامتي وما يخصنيش أي حاجة قديمة يهمني وقت ما عرفت منة فقط.

وتابع محمود المهدي: بالنسبة لبوست البطيخ ده ما كنش لمنة كان لشخص من الماضي داخل يبوظ العلاقة.. أرجوكم بطلوا تأليف.

وتدخل محمد نجاتي لتوضيح حقيقة ما حدث وأوضح عبر حسابه بموقع الفيس بوك أنه خلال تصوير مسلسلهما الجديد، الذي يحمل اسم فيلا 101، اضطر إلى أن يمسك يد منة عرفة التي تجسد دور شقيقته، وهو يجسد شخصية طبيب نساء، وهذا في إطار الدور الذي يقدمه.

وتابع نجاتي قائلًا: والله محصلش حاجة غير أني مسكت إيديها أقيس النبض، في تصوير مسلسل فيلا 101.

وتابع محمد نجاتي: المفروض إني في المسلسل طبيب أمراض نساء، ولما أكشف عليها فأعرف إنها حامل، وكان لازم أعمل كدة، معرفش إنه هيكون سبب في خراب بيوت ناس، أنا مالي أنا.

يذكر أن منة عرفة أعلنت عودتها لعصمة زوجها بعد أيام قليلة من الانفصال، واعترفت بأنها أخطأت بمشاركة الجميع تفاصيل حياتها الخاصة، وقالت منة عبر خاصية ستوري على حسابها بإنستغرام: من أصعب اللحظات الي ممكن تعدي على اي ست لحظة الانفصال وخراب البيت، الطلاق بيتهز له عرش الرحمن، لكن انتوا يمكن عشان بتسمعوا عن بيوت بتتخرب كل دقيقة فا بقى ابغض الحلال عن الله بنسبالكو نكتة او حاجة تتمسخروا عليها، رهان بتعملوه مع بعض على اننا مش هنكمل، أو مادة خام للشماتة فينا.

وأضافت: خراب البيت عمره ما كان حاجة سهلة على الست او على الرجل او على اهالينا، في عز ضعفي وحزني وكسرتي اللي ربنا ما يكتبها على اي ست مرحمتونيش ولا قدرتوا اني في موقف لا احسد عليه وشمتانين فينا.

وتابعت: قد ايه انتوا ناس متعرفش ربنا ولا في في قلوبكم رحمه، اتمنوا الخير لبعض يا جماعة بلاش نشمت في بعض، لكن دي غلطتي اني شاركتكوا حياتي الشخصية.

وواصلت قائلة: الانسان بيغلط عشان يتعلم وانا اتعلمت، ربنا يعينكوا على نفسيتكوا الجحيم دي، وعسى ان تكرهوا شيئ وهو خيرًا لكم، يمكن الخلاف اللي حصل كشفلنا ناس كتير حوالينا كانوا بيمثلوا انهم فرحانين لينا بس الحقيقي انهم كانوا مستنيين أول مشكلة عشان يشمتوا في كسرتي وخراب بيتي.

واختتمت منشورها قائلة: ربنا مش هينولهلكوا وربنا يخليلي اهلي وزوجي والناس اللي بتتمنالي الخير ووقفت جمبي، وكلمه أخيرة للسادة الصحفيين ارجوكوا كفاية بقى ارحمونا حرام عليكم.