في أحدث ظهور له، صرّح الفنان المصري، خالد زكي، أنه يمرّ بوضع مالي صعب، اضطر على إثره لبيع سيارته. وقال زكي في تصريحات، لبرنامج (ليالي تن) مع الإعلامية المصرية، بوسي شلبي، "أنا ليس لي رصيد في البنك".

وأضاف "للأسف أنا مشيت بطريقة الناس تختلف معايا فيها، اصرف ما في الجيب يأتيك ما في الغيب، أنا كنت بحب أعيش ولادي وأهلي وكل اللي حواليا يبقوا سعداء، أنا آخر حاجة بفكر فيها أنا، ولا يفرق معايا خالص، فمعملتش حاجة خالص"

وتابع زكي "لو قلتلك أكتر من كده مينفعش..لو قلتلك الظروف المادية إزاي بتخلبطك مينفعش أقول..أنا من 2011 بعت عربيتي على أمل إن الظروف لما تتحسن هجيب عربية، والحمد لله الظروف اتحسنت كوضع أمني ولكن أنا لحد دلوقتي بركب عربية مراتي ومش قادر أجيب عربية، لأني بفكر إن الفلوس اللي ممكن أجيب بيها عربية أقدر اصرفها في الأكل والالتزامات، وبحس بقهر من جوايا على الأحوال المادية بالنسبة لجيلنا".

وخلال اللقاء، انتقد زكي تهميش الفنانين الكبار، مطالباً بأن يكون نجوم الجيل الجديد والقديم جنباً إلى جنب، كما هو الحال في العالم الغربي.

وقبل عدة أيام، تداولت مواقع التواصل الاجتماعي، شائعة وفاته، بشكل كبير، فقال في مداخلة مع الإعلامية شافكي المنيري ببرنامج (التاسعة) المذاع عبر القناة الأولى المصرية : "من سنتين نزلت إشاعات إني عيان وبودع، وطلعت أيامها مع عمرو الليثي ونفينا، ورجعت الإشاعات تاني من أسبوعين، والتليفونات لا تنقطع عني وعن بيتي".

وأضاف : "الشائعات كبيرة جدا وإمبارح موتوني، والمشكلة إنها تضر الأقارب والعائلة والناس، وأطالب بتحري الدقة في تناول أي خبر له علاقة بالمرض أو الوفاة، من خلال الاتصال المباشر بي، أو بالنقابة، أو من خلال الصحف والبرامج التليفزيونية، لأن أخبارها مؤكدة".