1- الأخبار

بدل ما كان الواحد بيدخل على فيس بوك علشان يفصل أو يغير جو دلوقتى بقى فيس بوك هو مكان بتتجمع عليه كل الأخبار من كل حتة في العالم، أخبار الحرق والقتل والسرقة وغيرها، واللي في الغالب أنت هربان منها.

2- سمك لبن تمر هندي

لأنك لما بتفتح الصفحة الرئيسية بتلاقي سمك لبن تمر هندي صفحة الحب بتجيب صور حب وكلام رومانسي –لا يمت للواقع بصلة- تهيم معاهم شوية وبعدها تفوق على كوميكس بتسخر من حاجة معينة فتقعد تضحك مبتلحقش –يا كبد أمك- تكمل ضحتك تلاقي عينك خبطت في خبر مصرع 30 شخص إثر حادث على طريق كذا، فتنقهر، وفي الآخر بتلاقي نفسك مش فاهم حاجة ولا عارف توصف إحساسك، والحالة دي العلماء بيسموها التخلف الانفعالي!

3- أنا جاي هنا ليه؟

أنت أصلاً بتبقى فاتح الموبايل علشان تدخل تبعت إيميل أو تكلم حد أو تعمل أي حاجة، وفجأة تلاقي نوتيفيكيشن جايلك من فيس بوك والدقيقة تجيب ساعة والساعة تجيب ساعتين، والوقت يروح وتخرح وتقفل الموبايل علشان الوقت اللي ضاع من غير ما تعمل الحاجة اللي أنت كنت ماسك الموبايل أصلاً علشان تعملها.

4- الذكريات

فيس بوك اليومين دول بقى عامل زي خالتي اللتاتة، طالعلنا في تقليعة جديدة، قال إيه بيفكرك! وأنت مالك أنت! حد قالك إني عايزة افتكر. زي النهارده من سنة أو من سنتين أو أكثر كنت بتعمل إيه! يعني مثلا من 3 سنين كنت بتحتفل بأول مقابلة ليك مع المودام اللي أنت دلوقتي بتعيش معاها أسوأ لحظات حياتك، تفضل تقول لنفسك: كنت مغفل!   أو مثلاً الفيس بيفكرك زي النهارده من 7 سنين، وتظهرلك صورة فتاة برئية مقبلة على الحياة وزنها لا يتعدى 60 كيلو، تبص على نفسها في ذات تلك اللحظة لتجدها بقت عاملة زي الكورة اللي بيدحرجوها وزنها تخطى 120 كيلو -ياصغيرة على الهم يا لوزة-.

5- المنظرة

لأن ناس كتير معتقدة إن فيس بوك ده عرض أزياء، فبيتعمدوا إظهار حياتهم بالشكل المثالي للآخرين. يعنى إيه؟ يعني يبقى جوزها ضاربها ومقطعين بعض وتحط صورتهم مع بعض وتعلق تقول: "مي لافلي هاسبند".   واللي أول مرة يروح شرم في حياته ويحطلك صورته بمايوه الخطير وكاتب يقول: "الشاطئ المفضل بتاعي فى شرم".   واللي بيصورلك نفسه فى مكتب مديره اللي مجاش النهارده، وهو لابس الحتة اللي على الحبل ويعلق قائلاً: "مكتبي في الشغل".   كل الحاجات دي بتخليك تفكر وتعمل مقارنات مع حياتك الشخصية وإنجازاتك اللي محققتهاش فبتحس إنك مش سعيد وإنك فاشل فاشل فاشل.

6- المقارنات

فيه ناس بقى شغلتها في الحياة إنها تقارن بين اللي بيحصل في مصر واللي بيحصل في دول العالم بالصور. مثلاً: المترو في مصر والمترو في الإمارات الشقيق. طرق التعليم في مصر والحاجات الغريبة اللي بيعملهوها في كوكب اليابان الشقيق، صورتين وبيجيلك بعدها تخلف في الركب.

7- صفحات فيس بوك المثيرة للآلام

فيه صفحات موجودة على فيس بوك علشان تحرق دمنا –إي والله- صفحات محبي الشوكولاتة، مثلاً تفضل الصفحة تعرض صور مثيرة للأعصاب، شوكولاتة سايحة واللي بالمكسرات، واللي بالبسكويت ومفيش مانع تظهر إدماج الشيكولاتات مع التورت المختلفة وأنت بتتفرج على الصور دي غالباً بتكون مزنوق في الميكروباص والطريق واقف وبينك وبين أقرب كشك لا يقل عن الساعة. كفاية وصف بقى في الصفحات المثيرة للأعصاب دي لأن شكلك بتقرى المقال ده وأنت لسه على الدائري وهتدعي عليّ!