اللقاء الأول مهم دائماً، في الشغل مثلاً هو اللي بيتحدد على أساسه قبولك المبدئي في الوظيفة أو لأ، فما بالك لو بتقابل بنت عجباك وبتتمنى تكون هي زوجة المستقبل، في حاجات مهمة جداً في أول لقاء إن كان هيتم بينك وبينها كتعارف أو كجواز صالونات:

1- أرجوك استحمى واغسل أسنانك

  في ناس مش مدركة فعلاً مدى أهمية النظافة الشخصية والريحة الحلوة في علاقتهم بالناس، في علاقات فعلاً بتنتهي عشان السبب ده، أرجوك في المقابلة الأولى مينفعش تروح بعد يوم شغل طويل، أو بعد معركة تلاحم بشري في المترو، لأنك ممكن تكون نظيف وريحتك حلوة وزي الفل بس لأنك عملت الجريمة دي في أول مقابلة، هتلاقي البنت اختفت في ظروف غامضة بعدها، أرجوك كمان لو عدم الاستحمام طبيعتك روح زي ما أنت عشان المسكينة دي تكتشف من أولها ومتعانيش باقي حياتها.

2- متتكلمش كتير

  أنا عارفة إن أغلب الناس لما بيتكلموا عن نفسهم بيكونوا مبسوطين، بس الإنصات فضيلة صدقني، في أول لقاء بالذات بيكون مهم الناس تسمع بعض عشان يتعرفوا على بعض، فاتكلم شوية واسكت شوية، البنت لو حسّت إن معندهاش فرصة تعبّر عن نفسها لأنك بالع راديو، هتملّ وتزهق وتبقى مش عايزة تشوفك تاني، كمان كلام في سرك حتى لو أغلبنا كستات بنحب الرغي بس مبنحبش الراجل الرغاي.

3- متسكتش كتير

  أعتقد دلوقتي أنا حيرتك لأني لسه قايلالك متتكلمش كتير ودلوقتي بقولك متسكتش كتير، بس زي ما قلتلك خلينا في خط الوسط وكل حاجة هتبقى تمام، لأن السكوت الكتير بيخلق حالة غموض، والراجل الغامض بسلامته مش محبوب عند كل الناس، إلا لو إنت حسين فهمي وهيسعاد حسني وده طبعاً مش حقيقي.

4- متكدبش

  الرغبة في إننا نبان في صورة أحسن من حقيقتنا دي غالباً عدم ثقة في النفس، ولأن الكدب ملوش رجلين ولا إيدين فكل شيء هينكشف ويبان، لما تتكلم عن نفسك أو شغلك أو عيلتك قول الحقيقة ولو في حاجات مش عايز تقولها في أول لقاء حقك، بس اللي تقرر تقوله يا ريت تقوله بصدق.

5- ادفع لازم تدفع

  لو هتقابل البنت في كافيه أو مطعم، اسألها عايزة تاكل الأول وبعدين تشرب حاجة، بلاش تحسسها إن الشاي مفيد لصحتها، بما إن الشاي أرخص حاجة في المنيو، ومتقلقش هي هتعمل فيها كيوت وهتقولك إنها لسه واكلة من 3 ثواني، ولما يجي الحساب إوعى ثم أوعى تخليها تشارك في دفع الحساب حتى لو حلفت عليك بالطلاق، لأن دي تفاصيل ممكن إنت تعملها بحسن نية بس البنت هترجمها إنك بخيل.

6- خد معاك بوكيه ورد أو علبة شوكولاتة

  لو الجوازة زي ما بيقولوا عليها جوازة صالونات، ورايح بيت البنت يبقى لازم تاخد معاك في أول مقابلة أي حاجة، أنا شخصياً شايفة إنها بتكون تعبير عن التقدير ومش لازم تجيبها بألف جنيه يعني، ولو معجبهاش يبقى البنت وأهلها بيحبوا المظاهر ومن الأحسن إنهم يرفضوك الصراحة، أهم حاجة بس إنك تختار حاجة شكلها لطيف.

7- متردش على مكالمات أثناء المقابلة

  اللقاء الأول تحديداً لازم تبيّن فيه كامل التقدير للوقت اللي البنت قررت تديهولك من وقتها، فياريت قبلها تعمل تليفونك صامت، ولو في مكالمة مهمة جداً ومضطر ترد عليها، لازم تعتذر قبل ما ترد وتحاول تنهي المكالمة في أسرع وقت وتعتذر تاني بعد ما تخلّص، وطبعاً مش محتاجة أقولك إن ده مش وقت رد على رسايل جروب أصحابك على الواتس آب.