نفى الفنان هاني رمزي، صحة الشائعات حول هروبه من مصر وهجرته النهائية برفقة أسرته إلى كندا، وبرر اختفاءه في الفترة الماضية بتواجده مع العائلة في الساحل الشمالي، وشن رمزي هجوماً حاداً على كل من حاول استغلال اسمه لتصفية حسابات لا دخل له بها.
أكد هاني رمزي خلال مداخلة هاتفية مع الإعلامي أحمد موسى خلال برنامجه “على مسؤوليتي”: انا مختفي في الساحل الشمالي تخيل دا أحلى اختفاء، أنا مش بتفرج ومش بهتم بالناس دي خالص، أنا صحيت على كم كبير من الرسائل قولتلهم يا أخوانا في ايه، دانا يومها بالليل كنت بتفرج على مسرحية في المسرح القومي، وطلعت الساحل بعدها ولما سألوني قولتلهم عالم بتهري وخلاص، حتى الكدب مش عارفين يكدبوه.
وتابع حديثه، قائلاً: مصر هي من قامت بعمل هاني رمزي ولا يمكن أن أتنكر لبلدي، وانا كنت فكرت أهاجر قبل كده فعلًا، لظروف وأخذت إجراءات جدية، بعدما تلقيت تهديدات وكله قال لازم تبعد ولو فترة صغيرة، هددوني كتير وحرقوا عمارتنا ومكتب أبويا حرقوه بالقضايا اللي فيه وعملوا حاجات كتيرة كلنا فاهمينها وعارفينها.
واستكمل هاني رمزي حديثه: بطمن جمهوري أنا بجهز بعمل فني جديد، لمشروع فيلم كوميدي عن السوشيال ميديا، بجانب عمل مسرحي آخر سيتم الإعلان عنه أيضاً، وأنا حالياً في الساحل الشمالي والجو حلو جداً.
واختتم: أنا في الساحل الشرير الأسعار هنا غالية شوية ولكن الإقبال غير عادي وحفلة عمرو دياب امبارح قفلت الساحل الشمالي ومصر بخير والسياحة بخير، وكل الخدمات موجودة والجميع يتفانى لخدمة الناس لتكون مصر عاصمة الترفيه والسياحة الشاطئية والمتعة في الصيف.
