قررت مقدمة البرامج ياسمين عز الرد على التصريحات المنتشرة لها حول المرأة اللبنانية التي ستنافس المصري على زوجها بعد الحرب الإسرائيلية على لبنان مؤخرا.
وقالت ياسمين عز في حلقة الخميس الثالث من أكتوبر من برنامج "كلام الناس": "وحشتيني يا مدام، وأكيد عارفة ومتأكد وواثقة إني كمان وحشتك، وأكيد وحشتك نصائحي اللي من العصر الحجري، الغريبة يا جماعة إن احنا كان بقالنا فترة أجازة، كان بقالنا شهرين، أغسطس وخدنا كمان اللي بعده، والبرامج ما شاء الله في كل حتة مالية الدنيا، ورغم كدة الناس مالهاش سيرة غيرنا، اللي يقول لك ياسمين قالت كذا، وياسمين صرحت بكذا، ياسمين اهي أدامكم لا قالت ولا صرحت وكنت في أجازة بحضر للموسم الجديد".
وأضافت: الحقيقة من وقت ما بدأنا البرنامج وكل فترة كدة يا إما حد لغرض ما في نفسه ينزل صورة لي عليها كلام ماقولتوش عشان يجمع بها عدد متابعين أكبر لصفحته، أو موقع من المواقع اللي محدش بيسمع عنها حاجة يفبرك تصريح على لساني ماقولتوش عشان يجيب له مشاهدات خرافية، دا مفهوم من زمان.
واستكملت ياسمين عز: بصراحة طول عمري متعودة بترفع ومابردش، لأني لما بتكلم مابتكلمش غير هنا، الحلقات موجودة والفيديوهات موجودة وشاهد موجود، الناس عارفة بقول ايه ومابقولش ايه وبالتالي بكبر عقلي، لإن لو كل حد نزل صورتي وعليها شوية كلام هو عاجبه وهرد عليه مش هنخلص، وأنا طبيعتي في الحياة مابردش.
وتابعت ياسمين عز مبررة سبب ردها هذه المرة: لكن المرة دي ليه لازم ارد وأعقب وأقول، لأن التصريح والكلام الفارغ المنتشر على مواقع التواصل الاجتماعي بقاله أسبوع عن موضوع لبنان، دا حقيقي مفبرك وماقولتوش وقررت أطلع أنفيه لأكتر من سبب، أهمهم لأنه بيمس وجع شعب غالي على قلوبنا، وعيب تهزروا هزار سخيف على بلد عنده أزمة وشعب بيعاني، مش وقت تريندات سخيفة خالص على حساب أرواح ناس بتموت، في حرب يا بني آدم في ناس بتموت، ربنا يحفظ أحبتنا وأهالينا في لبنان، وتعودنا دايما وتميزنا دايما كمصريين بالأدب والاحترام والثقافة واحترام مشاعر الغير، وتكون دايما بيوتنا مفتوحة للبنان وغير لبنان، مصر أم الدنيا.
وأضافت: السبب الثاني، مهم كمان أن اللي يعرفني كويس ويعرف ياسمين عارف إني مش هقول كلام زي دا، لأنه عكس قناعاتي تماما، لإني مش محتاجة سبب أو مناسبة عشان اطلع اقول لك دلعي جوزك، لأني تقريبا من أول يوم في البرنامج بتحايل عليكي تدلعي جوزك، وثانيا ودا الأهم مافيش حاجة في الدنيا اسمها واحدة تيجي تاخد جوزك منك، هو مش كيس بطاطس، والله لو ملكة جمال الكائنات ما تقدر تاخد جوزك منك طول ما انتِ مريحاه، عيني مابتشوفش إلا أنتِ قلبه دا معششة فيه.
وكانت التصريحات انتشرت عبر مواقع التواصل الاجتماعي أن ياسمين عز قالت: "دلعوا رجالتكم اليومين دول.. إنتو مش قد اللي ممكن تيجي من لبنان".
