سألني حفيدي: ياجدي .. الجنة فيها كهرب..؟!!
فاجأني السؤال من طفل لم يتجاوز الثماني سنوات.. ابتسمت وقلت : أعتقد لا ..مفيهاش كهرب ولا شواحن وليدات وبطاريات ولا موتورات ولا شركة وجباية ودفع مسبق ولا فواتير متلتله على الناس الكحيانة..
الجنة يا سيد مفيهاش ضريبة البلو ولا الاورانج ولاالعماري سفير قطر اللي بيمنع وبينزل المطر بالدولار .. ولا فيها جدول أصعب من جدول الضرب كل يوم في حال من ثمانية لسته لاربعة لتنتين حسب مزاج المسؤول نور العين ..!!
الجنة يا سيد فيها نور الهي لا ينقطع ولا يؤذي العينين.. نور فياض خاص بالمؤمنين الأتقياء الصالحين بحق وحقيق من نوعية ابو بكر الصديق ..مش زي مؤمنين اليوم.. شوية تجار دين وسياسيين مجرمين ..مؤمنين بس بالكرسي والمائدة والنساء..!!
انبسط الولد وانفتحت شهيته لسؤال آخر.. متى يا جدي نروح ع الجنة ونرتاح من هم غزة ونارغزة..؟!!
شهقت من طول لسانه وعمق كلماته الاكبر من سنة واستغفرت ربي وضممته الى صدري..
بدري يا سيد بدري.. الله يعطيك الصحة وطول العمر وتعيش وتعاني لغاية ما اشوفك دكتور أو مهندس..أو صيدلاني وأكملت جدته أو وزير فقلت محتجا :فال الله ولا فالك ياشيخة ..هيك مش حيخش الجنة أبدا لا هو ولا أي مسئول ولا حتى شيخ الجامع.. !!
هتف الولد ببراءة :ليش؟؟؟؟ قلت:لما تكبر وتوعى حتعرف الجواب... بس أقول لك الجنة بدها صدر نقي وإنسان تقي وعمل خير مش مجرد زبيبة مزيفة وسبحة وأول صف..!!
الجنة بدها قلب نظيف ويد تقسم الرغيف بينها وبين الجار..!!
انتبهت لنفسي ولحماستي وانا اشرح للولد وكأنه ابن توجيهي وهو مسكين فاغر فاه.. ابتسمت وقلت سامحني يا سيد ..خذ هالشيكل واشتري لك حاجة تعوضك عن هالنكد..!!
بقيت وحدي في صومعتي ومنفاي الاختياري مقتديا بجدي (واصل بن عطاء) شيخ المعتزلة.. فقد اعتزلت منذ وقت حفلات النفاق ومسح الخوخ ووضع الرمان على الخوخ وزهدت في جلسات العصف الفقري التي لا تغني ولا تسمن بل تصدع الراس بما فيها من رغي واستعراض أشبه برائحة المرحاض..!!
أغلقت مسامعي عن المناكفات بين الكوفيين والبصريين من اهل غزة وهم يتلذذون بعذاباتنا وهمومنا ويتاجرون بآلامنا بينما وكراسيهم المثقلة بكروشهم المريضة وخلفياتهم العريضة ترتاح على أطراف أصابعنا ..!!
غزة تخون رام الله ورام الله تتهم غزة وتوم وجيري يتبادلان الاتهامات عن اسباب وكسة الكهربا بشكل ممل ومخزي لا يحترم وعي المواطن المقهور ..!!
مظاهرات سلمية خرجت طلبا لكهرباء كريمة فواجهت هراوات ومطاردات واقتحامات واعتقالات ..!! الفصيل حاكم غزة يخرج نكاية بمظاهرة تدوس فيها صور الأعداء وتحرقها .. فيرد الفصيل الحاكم في رام الله بمظاهرة مضادة تشتم وتلعن..!!
لقد مللنا وقرفنا هكذا مسلسل تركي ..كل ما بدهم يشحدوا على ظهورنا يفتعلوا ازمة الكهربا..!!
مع ان الكل يعرف ان هناك المؤسسات الرسمية والمساجد و.. و... تنير وتكيف ببلاش على ظهر المواطن ..!! وياللي أبوك القاضي نشكيك لمين ؟؟
ماعلينا...
بعد تنفيس بالونة باريس ووقاحة رئيس وزراء إبليس وبانتظار زعرنة كاوبوي( أمريكا اولا) ترامب الرئيس وقرار نقل السفارة.. علينا أن نرتب بيتنا من الداخل ... ونوحد الحارة ..ونحل مشاكلنا بقلب ورب بيكفي عاد قلة أدب ووحل وقذارة ..!
والحل بسيط إذا أردنا الحل.. وكانوا في غزة فعلا معنيين بالحل مش مناورة..
عليهم ان يسلموا الجمل بما حمل لحكومة الحمد لله بدون لف او دوران ... لا واوي ولا ويوي!!
ولنر كيف تتحمل رام الله المسئولية... بدون سهمدة احمد يوسف ولا تحليلات غازي حمد ولاتصريحات خليل الحية ..!!
اللهم يامقلب القلوب وعلام الغيوب ومفرج الكروب .. ارحمنا .. لقد هرمنا ووهن العظم منا وآخر دعوانا ان الحمد لله رب العالمين ..وانت يا شعب الجبارين ..قم واستقم ..!!
